回主頁 ホームへ

 

 

真係不得了!!實在令人難以置信!!半場落後0-3,大家睇怕都熄電視早d抖喇。但我身為利物浦 & 大長今 FANS,梗係唔會咁易放棄啦!總係覺得有份信念支持住自己,撐住撐住!無人可以教我放棄∼∼ 好在賓賓領隊同我個諗法係一樣!半場休息播左少少大長今o既片段 . . . 「我唔會放棄 . . . 我唔會放棄 . . .」成班球員即刻醒神!乜都返晒黎∼ 結果下半場奇蹟真係出現左∼∼ 歐聯冠軍呀!我唔係發夢呀嘛∼∼

我而家個心情仲係處於極度亢奮 o既狀態!久久未能平復。雖然通完頂,但睇黎都係訓唔着架喇。一於唔請假,照返工∼ 呢場波有排講呀∼

2005.5.26 6:45 am

3月沖繩之旅 o既相片終於整理好∼ 今次行程雖然好特別兼且十分難忘(9日之內坐7次飛機!) ,但我都唔打算寫遊記喇。只係擺番個行程表,同埋少少有關資料俾大家睇睇。稍後如果有時間或者覺得需要有所補充,我會在某些相片加番d comment 落去。好,即刻去片∼

http://jpstay.com/bigstone/okinawa.htm

2005.4.17

足足有半年無晌呢度同大家見面,皆因自從上次歐洲三國紀行之後,不經不覺又飛左3次!(2次日本 + 1次新加坡)頻密程度之高,連我自己都覺得有少少過份!返香港之後要收歛一下先∼

話時話我咁耐無晌「大石語錄」出現,估唔到一 UPDATE 就來個海外現場實況報導!我現正身處於日本沖繩縣 o既石垣島,正在享受緊一個充實愉快 o既假期!而昨日由沖繩本島(那霸)直飛与那国島,所乘搭 o既更加係「琉球航空 RAC」o既螺旋槳飛機!十分架勢∼∼ 此外,我亦趁呢個機會去埋日本 o既最西端!(相片先睹為快↓↓

明日(3月8日)我將會由石垣島出發,前往日本最南端之地 -- 波照間島。去埋呢度,我就真真正正踏足晒東南西北四個篤篤喇∼(以往個人記錄係日本本土之四端,唔計離島)到時個感覺係如何?去完返來再話俾大家知∼ 行ってきます ∼∼

2005.03.07

※ 筆錄於 2005 . 3 . 7 @ 沖繩・石垣

  上載於 2005 . 3 . 19

秘密地籌備已久 o既歐洲之旅,今日終於實現喇∼ 今次係小弟 o既歐洲初體驗,心情特別興奮!屋企人/朋友/同事話我竟然唔係去日本,真係有d surprise ∼∼ 嘻嘻,連我自己都差d搞錯。前兩日去銀行兌換外幣時差d兌錯左日圓添∼

今晚夜機先飛曼谷,再轉機往巴黎。歐洲紀行17日之旅大期待∼ 中秋節當晚等我睇下外國人 o既八月十五係咪特別圓先∼

10月10日回港,稍後再同大家傾過∼

2004.9.24

啊!原來已經成兩個月無 UPDATE 到「大石語錄」!呢排忙兩樣野:1)euro 2004 睇到天昏地暗日夜顛倒。2)大 PROJECT!!就係建立 jpstay.com 日本住宿討論區∼∼ 為左令到大家有個集中do既地方,去查詢及討論日本住宿 o既情報,以及令到我更加能夠靈活調配到各項有關資料;所以呢個討論區事在必行∼(可以話係將「大石住宿留言版」&「大石のご予約」合二為一。)今次多得 site manager 兼合作夥伴 KK 之協助下,呢個 FORUM 終於能夠順順利利開張大吉∼∼

http://jpstay.com/phpBB2/index.php

大家得閒過來捧下場啦∼∼ 

2004.7.17

好耐都無講我隊利物浦喇。趁球季剛剛完結,晌度順道恭祝一下先∼ 今季球隊表現的確未如理想,連贏幾場之後往往又會輸番幾場,水準實在唔夠穩定。但好彩最後有驚無險地都撈番個殿軍,做「四哥」來季有得踢「歐聯」,叫做有d交待啦。(反正今季都係阿仙奴威晒∼)下季再努力!

不過球會最近就新聞多多,好似話俾人買起喎∼ 仲要係 . . . . . . 泰國!!雖然我地香港同泰國都係亞洲 o既一份子,但今次我就真係唔想佢收購成功喇。點解?關於足球,泰國最叻係乜野??咪就係波衫囉∼ 大家去過泰國應該都有留意到,各隊勁旅 o既波衫真係通街都有得賣∼(當然係「仿真」啦∼ 但d質素又唔夠我地中國同胞咁好手藝喎)若然真係俾呢位靚仔 Mr. 他信買起,一個唔覺意輸入埋d假波衫俾球員著 . . . . . . 到時奧雲仔踢踢下件衫甩色,又或者謝拉特一個長傳之後條褲爆呔∼ 咁就真係失禮死人喇∼ 

不過我最唔想見到 o既,就係睇直播果陣,利物浦主場晏菲路球場個著名 o既看台 KOP STAND,企幾件人妖晌度吶喊助威!該煨該煨∼ 千祈唔好!! (唉∼ 今晚一定發惡夢∼∼)

2004.5.17

多謝網友 nobori 報料 ∼∼ 原來呢期「大石」呢個朵晌日本好「恆」下喎 ∼∼ 香港就話有「大石のご予約」o者,日本果邊生意仲伸展到搞埋「フレッシュミート」(FRESH MEAT)。啊,連牙醫都撈埋!去牙石一流?!我有機會都去幫襯一下先 ∼∼

 

2002.4.21

前晚(2月20日)在機緣巧合之下,無啦啦有機會走左去睇關心妍 o既 CONCERT。我一向都有聽開 Jade o既歌,覺得佢把聲幾特別,唱功不俗,亦都認同佢係屬於有實力 o既歌手。不過出道只係短短兩年咁上下,咁快就可以去紅館開演唱會?(阿光妹就話得 o者∼)開頭真係有少少擔心架。但結果我睇完之後,結論係:掂! 座無虛席,氣氛熱烈!好野,無被人睇死∼∼

講番個製作,其實好明顯睇得出成個 CONCERT 係好俾心機去做。三面台格局簡單唔搞花巧 o野;有d歌曲係經過重新編排,出來個效果都唔錯;專程由日本請返來 o既呢隊 BAND 好 Pro 水準好高;阿 Jade 唱現場亦愈來愈有駕輕就熟之感,去到d高音位都唔覺係夾硬 o黎。總括來講整個 CONCERT 合格有凸,我俾75分啦∼ 即係話仲有進步 o既空間。希望阿 Jade 繼續努力,唱多d好歌製作多d好 o既唱片俾大家∼

畢竟現今香港 o既所謂樂壇,真真正正識唱歌 o既新一輩女歌手確係唔多(淨係掛住拍戲拍廣告搞緋聞 o既大有人在)。其實我要求唔高架∼ 都係d基本野 o即:唱 LIVE 唔走音唔甩咀,唔會忘記歌詞就扮喊,打扮自自然然唔搞咁多無謂野,咁就得架喇∼ 亦都唔需要話跳舞跳到曉飛,唔使紋身(紋隻鬼晌臀部丫笨∼),唔使陪老細上遊艇 . . . . . . 

好啦,點都要鼓勵一下 o既。一於上榜啦,成為石波止場 My Favorites o既一員!YEAH ~~ 能夠同阿光妹 & 倫伯齊名,係咪覺得好榮幸哩∼∼

P.S.:有樣野我唔係好滿意 . . . . . . 之前呀,做呢個 CONCERT 之前去日本集訓果陣,做咩唔幫襯我「大石のご予約」?!

2004.2.22

最近趁農曆新年公眾假期果幾日,晌屋企等親友來拜年之同時,忽然雅興大發一鼓作氣寫晒 DAY 13 + 14 + 後記,幫個世界盃遊記埋齋!拖左咁耐終於了左件心事,個感覺非常良好∼∼ 再加上較早前完成 o既兩個遊記,夾埋3個一齊擺晌個網頁度我自己都覺得幾架勢∼∼

  

大家睇完「無間道 Ⅰ Ⅱ Ⅲ」,再睇埋「魔戒三部曲」的話,不妨都過來捧下場啦∼

2004.2.4

P.S.:特別新聞報告:

日本給予香港旅客免簽證入境待遇!

    

昨日上去公司某客戶 o既 OFFICE 做野,咁 o岩人地派利是封 & 揮春!我當然唔會執輸啦∼ 好!送埋俾大家∼

龍馬精神 財源廣進

心想事成 如意吉祥

2004.1.22(大年初一)

 

尋日係「1・17 阪神淡路大震災」9週年記念。呢次大地震亦都係我生平以來,首次感受到大自然災害所帶來 o既震撼性。雖然當時(1995年)自己身處於事發地幾千公里外 o既香港,但記得當日睇住電視新聞片段,災後 o既情況及影像不斷活現眼前:建築物倒塌,地面爆裂下陷,整個天橋躉連根拔起,震後大火災 . . . 就算直到現在,仍然歷歷在目記憶猶新。幾年後(1998),當我有機會到大阪/神戶旅行 o既時候,在神戶北野異人館附近發現左一間小小 o既地震資料館,亦都特意地入去參觀一下。

 

直至最近我再 search 到,在神戶市原來另外仲有一間比較大規模 o既記念館:阪神・淡路大震災記念:人と防災未来センターDisaster Reduction and Human Renovation Institute)大家如果去開神戶的話可以順道去見學一番。我個人認為非常值得去睇睇。

2004.1.18

大家有無睇今晚 TVB o既「衝上雲霄」(第7集)??無睇?!拿拿聲問下屋企人或者親戚朋友有無錄低啦!今集有咩乜咁巴閉呀?唔係我出鏡 . . . . . 而係成班演員去北海道取景∼ d景點相信大家都好熟悉啦:又札幌大通公園,又富田農場。其中富良野果間民宿 PENSION,正係我 2001 年夏天住果間!ペンションぽぷらの丘PENSION POPURA NO OKA一睇番 PENSION 之外貌同埋內裡d格局,就即刻認得出!真係好有親切感∼ 仲有些少覺得係自己屋企 o既 FEEL ∼∼ 阿老闆娘都唔執輸喎,撈返個角色玩下保持出鏡率(三嫂咪就係佢囉∼),仲有兩句對白添∼ 唔知 TVB 封番幾錢利是俾佢呢??

2003.11.4

上星期日 (9/21)o既日遊聚會,已經晌一個充滿歡樂氣氛之下,順利圓滿結束!大家都開開心心咁渡過左一個愉快 o既週日。來唔到 o既朋友唔使失望亦都唔好心急,當日之相片及花絮等等,大雄的日本世界 果邊已經整理好∼(去片∼)

另外呢,當日出席者當中,竟然遇見同我差不多日日見面 o既同事小湯米,同埋佢好朋友小耳朵!哼!好可惡!!佢地兩個自把自為報左名都唔單聲我知,你地話我幾無面呀!話晒我都係掛名工作人員呀嘛∼

好,一於公開佢地個日遊網頁:小耳朵日本迷失遊記!等大家睇下佢地去日本果陣有幾迷有幾失先∼∼  

2003.9.28

今期大石語錄有野要宣傳!!係乜野?就係搞得有聲有色 o大雄的日本世界日遊聚會又再正式開催喇∼(乜已經第8次架啦?!)名額有限,想參加就拿拿聲 CLICK 入去睇睇詳情啦!我會唔會去?到時你地咪知囉∼∼

2003.8.20

2003 年過左一半有多,但係好似發生左好多事,經歷左好多野咁。香港真係正值多事之秋!忽然睇番我年初1月1日對今年 o既期望/預測,竟然有d被我開口中喎∼∼

今年去日本起碼兩次!(中!2月去左一次,要去第二次 o既可能性唔會太低)

 

利物浦成為今季英超聯盟主!(唔中。不過就快來香港喇∼ 補番數啦∼)

 

日本給予香港特區護照免簽證!(唔中。不過好似都有考慮過 . . . . . .)

 

宇多田 ヒカル 無喇喇開 CONCERT,又無喇喇俾我買到飛!(唔中。光妹好似最近影都無埋。都話唔好咁早結婚架啦!!)

第23條僅以1票之微落敗,不能通過。(中!!)

倫伯譚詠麟一時技癢,年尾宣佈復出角逐最佳新人獎。JUNO 唔記得出糧俾 FANS,結果只能屈居第二。(又中!倫伯再度活躍之餘,JUNO 呢單野 . . . . . . 暫時不便評論啦。)

 

「大石のご予約」客似雲來,做到唔停得手!(中!好過初初開張果陣∼ 希望愈來愈好啦∼∼)

 

真係俾心機讀書,儲夠 POWER 年尾去考日本語1級能力試。(唔中。應該都無乜時間喇。)

 

董特首宣佈退休返鄉下耕田;阿松因為要照顧老婆安胎,請假一年;葉太因為恤唔到個靚髮,出外旅遊散心直至另行通知。前兩者位置分別由長毛甘神父分別補上;保安局長就由我屋企樓下食Q做住 acting (中!!原因唔使我再講啦∼)

 

唔好係咪都放煙花!!

(中!至少7月1日無放!)

 

咦?!隨意「up」幾句,命中率都有60%喎∼ 唔差得過成日上電視某幾位堪輿命理學家 o者!諗諗下,我走去執一執個 IMAGE,應該都幾上鏡架。日後大家搭巴士睇 ROAD SHOW 果陣,見到我個樣千祈唔好嚇親!

2003.7.20

教左我地兩年多日文 o既小貝老師,終於都功成身退,今日返日本喇∼(真係好醒!又識得用 HK$1000 CX 機票!)我就當然好唔捨得啦,話晒我d大石流日本語能夠 "up" 得兩咀,兼且2級能力試無厘頭符碌合格,小貝老師真係功不可沒!(當然先生d廣東話亦進步神速,我都有過番兩招架!)話就話唔捨得,但其實我都好贊成先生返去抖抖架。來左香港兩年幾,日日係咁做,一星期教足六日,都無真正好好休息過(呢個世界無良僱主多的是∼)返到日本後就真係要抖足精神叉足電呀,幾個月後又係一條好漢哩∼ 咁我晌呢度好衷心咁祝福小貝老師心想事成,前程似錦,有一個美好 o既將來,邁向人生另一個新階段∼∼ 

いままでいろいろお世話になりました。毎週金曜日の授業はおもしろくて楽しかったです。先生のおかげて私の日本語はだんだんうまくなりました。(まだぺらぺらしゃべれないけど・・・)本当にありがとうございました。先生がいなくなると寂しくなると思いますね∼ では、また日本に行くとき会いましょう∼ 先生も連絡くださいね∼ どうぞお元気で∼   v(^^)v

咦?下次去日本果陣,住宿咪有著落?好野!又可以慳番一筆!(我訓地下得架喇∼)

2003.6.29

大石語錄原來成兩個月無 UPDATE,疏哩疏哩∼ 不過我係有苦衷 o既。最近除左忙於搞「大石のご予約」之外,工作上亦有煩惱。困擾左成個月 o既減薪問題,終於都塵埃落定:我地社團高層話小弟咁多年來都係咁盡心盡力做野,真係無以為報,決定刻扣工資以示獎勵(%達到雙位數字!)仲要係6月5日出信通知,追溯番6月1日生效咁話喎∼ 唔 ...... 趁 SARS 問題稍為舒緩之情況下,即刻搞呢d小動作!我地社團真係有情有義!!其他基層同事亦得到相同優惠,大家接到封信果陣真係感動到喊∼∼ (啊!減完薪無話唔裁員喎∼)

現在大家 o既人工大約回落番97年 o既水平 ...... 睇見張糧單真係好有懷舊 FEEL!其實我諗大家同事都明白而家咁 o既時勢,係唔會介意一齊共渡時艱 o既。但係實際情況又好似唔係咁喎 ...... 有人繼續 FING 埋d無謂錢,請埋晒d無謂人;蝕左就我地呢邊一齊承受 ...... 人地就 BONUS 繼續逗 ...... 好無奈哩∼

唉,有人講笑咁講話我一年又去少幾次日本啦 ...... 我都唔敢回應。大把人係供緊樓養住頭家,仔細老婆嫩,唔可以貿貿然話劈炮唔撈 ...... 我地又地位低微無乜談判條件 ...... 總之,時勢艱難呀∼ 大家要頂住!!

所以,我都慶幸自己工餘時間搞下「大石のご予約」呢個方向係正確 o既。幾時都係靠自己好!

2003.6.15

舊年世界盃個遊記都未埋尾之情況下,20032月個遊記竟然搶先出閘!大家係咪好奇怪哩?!其實因為呢次o既製作單位係小瑪姬&肥仔伉儷,小弟只係寫幾隻字友情客串!輕鬆得多!!話時話,今次遊記個版面不知幾咁精美∼又 MOVIE 又特別效果,大家記得捧場呀∼∼

http://www.demon-shop.com/maggie/2003trip/index.htm

另外,大家唔好以為我好食懶飛唔做野呀!查實我呢排日日都係搞緊「大石のご予約」之版面大革新!現在正係 UPDATE 緊自己果個日本全國宿泊 DATABASE,遲d將會主動出擊,為大家推介日本各地之住宿(列明價錢,房間種類,到達方法等等。)總之,大家拭目以待啦∼∼

2003.4.14

最近非典型肆虐香港,大家晚晚睇新聞都知件事係幾咁嚴重,我都無謂再多講。

忽然望番自己個書架,唔覺意發現左一本好耐好耐無睇過o既書--「醫生札記」(都唔知點解會買??)作者當時係一位初出道,而又滿腔熱誠o既青年醫生,人生資歷尚淺。不過佢懷著一顆赤子之心,將當時所經歷o既人和事,以不同人物之際遇表達出來。當中故事有喜有悲,但都係作者對生命o既一番體驗。再對比番香港現時咁o既情況,真係感受到原來我地對呢d突如其來o既頑疾,係幾咁脆弱及無奈。相反來講,原來一直以來亦有一班人,不斷盡心盡力咁為我地服務,絕不放棄每個能夠挽救生命之機會!

呢本書係十幾年前由突破出版社發行,係佢地o既基督教叢書系列之一。姑勿論大家係屬於邊一種宗教信仰,都好值得花少少時間去讀一讀呢本書。尤其是對於現時之患者及其家屬,或者正在前線作戰緊o既醫護前線人員,都可以為佢地帶來一d正面訊息,同埋加添一絲鼓舞。

好耐未試過咁正經寫一篇文章。

2003.4.1

玩完返來都幾日喇,不過淨係個肉體返左來o即,靈魂仲賴低左晌日本;荷包就更加元氣大傷!今次北海道 + 東京 + 大阪 + 四國 TOTAL 16 日,但個感覺同以前果幾次又有d唔同喎∼∼另外仲經歷左一d唔係咁尋常o既事添!睇黎我遲下都要寫番個經歷出來架喇。不過,舊年世界盃個遊記都尚未完成・・・真係對唔住大家呀∼∼ 俾d時間我!!等我整理番好自己o既思緒,再催谷一下,一定有野俾大家睇!等我呀∼∼

2003.3.7

回鄉探親

大石のご予約照常營業年中無休!

其餘留言板,日遊討論區方面亦會繼續定時回覆,保持出鏡率。大家唔使旨意乘機講我壞話∼∼

2003.2.15

 

恭 喜 發 財

唔好講野,同大家拜個年先。祝大家羊年行大運,事事順境。個個笑口常開,笑到成個上面星爺個財神樣就最好啦!(仲要拎住個90年代至經典o既大哥大,問你服未?)

2003.1.31

今日係宇多田ヒカルo既誕生日呀!20歲喇!可以行成人禮喇!(咦?咁即係話結婚果陣仲未成年?都話俾人呃架喇・・・)點都好,恭喜恭喜!HAPPY BIRTHDAY!趁生日咁高興俾d野益下大家:光妹晌「成人の日」影左d和服 LOOK o既相 ,快d CLICK 入去睇睇啦∼∼

2003.1.19

呢期李克勤真係當旺喎,各大頒獎典禮當中「立」左唔少獎返來(最人氣男歌手就不在話下啦)。尋晚睇埋 TVB 個節目「紅星會-與李克勤同行」,都叫做真情流露,相信對佢個 IMAGE 又增加唔少分數啦!農曆新年期間個 CONCERT 仲要拍住老馬有火 o倫伯添!掂呀!呢個演唱會我就睇硬架喇,仲要係坐山頂位添呀!博阿倫伯又講佢果句經典金句丫嘛:「山頂 o既朋友您地好!!」最最最緊要係一定要唱夏日寒風!咁我地又可以跟住拍子一齊唱∼∼ 「♪♪♪XXX好睇,好睇,但係又好嘟貴・・・圖片美麗・・・♪」

2003.1.12

 

 

 

 

恭喜恭喜!新年快樂!祝大家身體健康,萬事如意!回顧過去展望將來,2003 新的一年我都許番個願先,睇下係咪可以願望成真?(發下夢都得o卦)

今年去日本起碼兩次!

利物浦成為今季英超聯盟主!

日本給予香港特區護照免簽證!

宇多田 ヒカル 無喇喇開 CONCERT,又無喇喇俾我買到飛!

第23條僅以1票之微落敗,不能通過。

倫伯譚詠麟一時技癢,年尾宣佈復出角逐最佳新人獎。JUNO 唔記得出糧俾 FANS,結果只能屈居第二。

「大石のご予約」客似雲來,做到唔停得手!

真係俾心機讀書,儲夠 POWER 年尾去考日本語1級能力試。

董特首宣佈退休返鄉下耕田;阿松因為要照顧老婆安胎,請假一年;葉太因為恤唔到個靚髮,出外旅遊散心直至另行通知。前兩者位置分別由長毛甘神父分別補上;保安局長就由我屋企樓下食Q做住 acting 先 ∼

唔好係咪都放煙花!!  2003.1.1

聖誕節大家去左邊度玩呀?平安夜當晚通街噴雪射到d彩帶一地都係果班人有無你地份呢?唔好制呀 ∼ 大除夕果晚就唔好再咁曳喇。如果唔係就好似舊年咁,警察叔叔星你兩巴同你 HAPPY NEW YEAR 呀 ∼∼

上面篇文章係乜東東?無喇喇 474849??其實係大雄兄報料,話呢期新X期介紹北海道,仲有一篇係講稚內&最北端之地宗谷岬添!不過該段報導有d不盡不實咁話。我咪即刻買來睇睇。結果發覺原來係星痕旅遊的鱔稿一篇,無病呻吟自吹自擂一番,極盡 HARD SELL 之能事。講到好似呢度要靠佢地開發,如果唔係無人識去咁款。仲話自己係第 4749 個香港人到訪(大雄兄99年9月去過我就2000年8月。我地都唔敢牙斬斬話自己係先驅啦!幾時輪到佢地講野?)仲擺埋人地稚内市長橫田 耕一さん上檯!(講到同人咁 FRIEND 無理由唔影番張合照架,呵?)再睇埋佢地其餘o既資料性報導,都係同實際情況有出入,寫鬼錯晒d野!大家信5成好喇。諗諗下,我咁樣講咪即係無喇喇幫佢地免費宣傳?笨左笨左。大家唔需要特登買黎睇架,問我借咪得囉。至於個474849 ・・・ 好,一於下期六合彩做膽!掂呀!

2002.12.26

最近難得有少許清閒,諗住趕番幾日稿,寫番好耐無 UPDATE 過o既遊記。點知某位損友無喇喇借左套經典電視劇俾我睇,搞到我心都散晒,仲要一路睇一路傻笑;屋企人見到我咁樣都唔知幾擔心!邊套咁犀利呀?!之唔係90年代 TVB o既「他來自江湖」囉!睇番劇照,唔單止有死o靚仔樣o既星爺,仲有狂燥萬梓良添o番!星爺當年就係靠呢套劇將無厘頭o既演技發揮得淋漓盡致,先至得人賞識,有機會進身大銀幕咋!如果唔係邊有而家咁風光呀。(我當年都有份推高 0.01% 收視率架!)

而家諗番起,果陣時d粗俗諧音口頭禪:大笨橙大支野霹靂大肉腸・・・等等,真係教壞唔少細路。咦?乜原來仲有句「XX語錄,句句入肉」!咁似我個標題o既?早十年已經抄我橋!乜你咁衰∼∼

 

 

 星:好野。       萬:失禮。

 星:佩服。

 

2002.12.17

大家唔好意思,今期大石語錄要講少少私人野)

尋人啟事

來自台灣的網友 KANG, YU-CHING 君,你好。歡迎你使用「大石のご予約」。你的宿泊預約申請已經收到,但資料上有少許遺漏。你的電郵是否有手民之誤呢? (不能送件至xxx@msn.hinet.net)如見字請盡快與我聯絡。我的電郵

2002.12.12

今期又講下我由細捧到大o既球隊 - 利物浦先。唉∼呢排唔知行咩衰運,頭頭碰著黑。英超聯最近四場一和三負,上場仲要輸俾宿敵曼聯!連龍門都慌失失,一向穩健o既杜迪克(Dudek)都醒球「屙蛋」咁羞家!你話死唔死。前鋒又唔爭氣,奧雲仔樹大招風;另外幾位前鋒就算換入場,又塞晒晌中間。睇黎領隊猴狸鴉要買番個翼鋒先至得喇。唏!最近好似鹹魚番生o既前「香港足球先生」李健X又如何?佢幾掂架,最緊要半場休息果陣派枝煙佢索下就得架喇。靠晒你喇!和哥∼∼

2002.12.4

好開心∼∼ 大石のご予約 終於完成第一單預約服務!!呢位網友真係醒,知道大除夕&新年期間日本方面住宿比較緊張,所以搵左我幫手。一個字:掂!你話我自己讚自己賣晒廣告都係咁話架喇!皆因呢次我用左少少技巧,酒店方面主動 SEND 左個「お得な宿泊プラン」俾我,比正價都平左一截架。呢個優惠我全數回贈俾番申請者,中間無任何抽水架。今勻就真係誇啦啦:有著數,有 FACE,(酒店)又有生意做。3贏局面呀!皆大歡喜呀!

都係等呢位網友返來先再讚我啦。另外亦有幾個 CASE 正在處理中,好快又可以成事。你地都唔好猶豫喇,住宿方面有疑難就不妨一緒に相談しましょう!填張 FORM 就得架喇。

2002.11.14

經過一輪自我催谷,大石のご予約之專用網頁正式誕生!申請表格及使用方法等等之詳細內容亦已經刊登於該頁上,敬請留意。在此要特別鳴謝小瑪姬及肥仔在技術上之幫忙,與及大大佬大雄之專業指導(法例方面)。另外當然唔少得晌討論區各位之寶貴意見啦!再次多謝!

咁係咁話囉喎,大家晌呢方面有疑難的話,唔好怕羞,記得搵我幫手呀!

2002.11.7

☆☆大石のご予約:開張啟事☆☆

由於最近網友們不斷詢問有關此項企劃之詳情與及運作細則,所以為了方便大家能夠及早確定聖誕/新年期間之宿泊預約,本人決定宣佈:大石のご予約提前在今日(11月3日)正式投入服務!為大家搜羅日本全國各地之宿泊情報,並提供預約服務。申請預約方面請各位提供以下資料:

1)姓名

2)聯絡電話及 e-mail

3)宿泊地區(例:東京,札幌)

4)宿泊日期(CHECK-IN/OUT 日期)

5)人數及房間種類/數量

6)其他意見或特別要求

請將以上項目電郵至這裡。其餘運作細則及模式會於回覆郵件中說明。

正式之申請表格及使用方法即將推出並刊登於本網頁上,敬請留意。

2002.11.3

お知らせ:大石のご予約

近來在討論區發覺有很多網友在預約日本宿泊設施時遇到難題,尤其是傳統日式旅館,或者是家庭式經營之 PENSION/民宿之類,都可能需要用日文預約及回覆確認。(普通大城市如東京,大阪,札幌之 HOTEL,相信大家都無問題。)有些網站或許會有英文版本,但可供選擇相對地少了一大截。有見於此,小弟希望利用自己之經驗,與及和日本方面住宿連盟之良好關係,為各位深入探討,搜盡日本全國各地,提供預約宿泊之服務。一切已經準備就緒,但之前亦都想聽聽各位之意見。請大家都投番神聖的一票啦!順利的話,下星期開張大吉!

投票 ← ← ← ← ← ←

2002.10.22

14號夜機抵港,15號一早就即刻回到工作崗位,你都咪話唔辛苦。返到公司,有位同事問起:「又係去日本?!你家陣當返鄉下咁返呀?」呢位同事平時不嬲都係拾下拾下,點知今次竟然俾佢開口中!!點解咁講?皆因今次行程第一晚住宿(PENSION NOAH),正是位於河口湖旁邊一個寧靜的深山小鎮。講你都唔信,呢度名叫・・・「大石」!!仲唔係我鄉下??

2002.10.17

失驚無神,小弟又有得去日本喇∼∼。今次因為有人係咁意 SPONSOR 少少旅費俾小弟,所以我晌自己銀行戶口屢創新低,跑贏大市之情況下,都能夠去一趟,實在太感動喇∼∼好,唔講咁多,出發喇!14號返港。大家唔好晌日遊討論區講我壞話呀!我日日 CHECK 住架。

2002.10.5

失驚無神,光妹咁就嫁左人喇!點解唔問下我意見先??新郎・・・咪就係佢囉。紀里谷 和明(34)。你地話襯唔襯苤H我無野講呀。

2002.9.8

 

果頭先至講完唔會「DUM」大家波鐘,好快會趕起篇遊記;呢頭就遲遲交唔到貨,一個星期都寫唔到一日。令大家無限等待真係唔好意思。不過大家都知,而家香港經濟唔好呀,d所謂大公司郁不郁又話要裁員減薪。小弟都好徬徨呀,所以最近咪不斷扮勤力做野囉,有OT即刻舉手爭住去。否則的話一個唔好彩被人兜左,就真係日日晌屋企寫遊記都得咯。(哼!邊個晌度偷笑?!)

話時話,萬一真係俾人炒左,咁我點算好呢?唔通要授徒開班,教大家「大石流日本語」??問過先生,佢話我2級符碌合格,再加少少授課技巧,已經可以試下誤人子弟架喇!(初初級)。本当ですか??喂,有無人願意俾我「誤」下呀?

2002.9.4

睇完4日儮C記,大家認為如何?會唔會覺得長篇大論得滯呢?由於要保持番上次亂咁行之旅麰榆獢A寫下寫下連我自己都覺得有少少口水多過浪花。有d地方掛住扮風趣,其他細節都唔記得左咯。算啦,唔打算修改喇,跟住落黎寫番精簡d扼要d啦。第5日正在回憶中・・・一諗到就會即刻發表,唔會 「DUM」大家波鐘。好快有得睇∼∼

都係果句啦:有咩意見就晌留言板日遊討論區多多交流,唔好同我客氣!

2002.8.16

不經不覺「石波止場」已經開張左一個禮拜,多謝大家支持!現在基本版面設定已經完成,大家睇唔睇得慣先?!遲d或者會加多幾項新環節,不過而家首要任務當然係快快手搞掂個遊記先啦!一來大家都咁捧場;二來係趁我仲記得當時發生黿◆P事,拿拿聲 DROP 低佢好d。呢次旅行途中我無寫日記架,不過有咁多新體驗,印象都加倍深刻。有時就憑睇番d相片來勾起我d回憶囉!

如果大家有咩意見,或者有新 IDEA 想我加落個網頁度,歡迎晌留言板果度題番幾隻字,我會經常 CHECK 架!另外日遊討論區亦都係我經常去瀏覽鵀a方,期待大家同我多d交流。

2002.8.7

大家好!はじめまして。初次晌呢度同大家見面。此網頁乃係小弟出道以來第一個 HOMEPAGE(試驗中),若然有乜野整得唔靚,睇唔順眼,阻頭阻勢之處請多多包涵。另外大家千祈唔好客氣,見到有咩唔妥鵀a方請立即指正,小弟會第一時間作出修改,從善如流。從今以後小弟一有空就會不斷更新呢個網頁,當正佢係親生骨肉咁湊大佢架喇,務求令到大家睇得開心又放心。多謝支持!我會繼續努力架喇!頑張りま∼す。

2002.7.30